قومی جوڈو ٹیم گرینڈ سلام میں شرکت کیلئے 25 اکتوبر کو ابوظہبی روانہ ہوگی

اسلام آباد (سپورٹس ورلڈ نیوز) 4 رکنی قومی جوڈو ٹیم گرینڈ سلام میں شرکت کیلئے 25 اکتوبر کو ابوظہبی روانہ ہوگی۔ پاکستان جوڈو فیڈریشن کے نائب صدر اور میڈیا ڈائریکٹر مسعود احمد خان کے مطابق گرینڈ سلام 25 سے 29 اکتوبر تک ابوظہبی میں کھیلا جائے گا جس میں4 کھلاڑی اور 2 آفیشلز پاکستان کی نمائندگی کریں گے۔ کھلاڑیوں میں قیصر خان، مد ثر علی، امتیاز حسین اور قاسم علی شامل ہیں جبکہ آفیشلز میں پاکستان جوڈو فیڈریشن کے سینئر نائب صدر پروفیسر ڈاکٹر فرخان عبادت یارخان ٹیم منیجر اور سندھ جوڈو ایسوسی ایشن کے سیکرٹری محمد رفیق بطور کوچ ٹیم کے ہمراہ ہوں گے۔ایونٹ میں شرکت کیلئے قومی ٹیم25 اکتوبر کو ابوظہبی روانہ ہوگی۔ انہوں نے کہاکہ ایونٹ کی تیاری کیلئے قومی کھلاڑی اپنے اپنے ڈیپارٹمنٹ میں تربیت حاصل کر رہے ہیں اور کوچز انہیں جدید اور اعلی معیار کی تربیت دے رہے ہیں۔ گرینڈ سلام میں دنیا بھر سے نامور کھلاڑی ایکشن میں نظر آئیں گے۔ میگا ایونٹ کیلئے نامور کھلاڑیوں کو قومی ٹیم میں شامل کیاگیا ہے۔ انہوں نے توقع ظاہر کی کہ گرینڈ سلام میں قومی ٹیم عمدہ کارکردگی کا مظاہرہ کرکے اچھے نتائج حاصل کرے گی۔