پاکستان کراٹے چیمپئن سعدی عباس نے حکومت سے سہولیات فراہم کرنے کا مطالبہ کردیا

لاہور ( سپورٹس ورلڈ نیوز ) پاکستان کے کراٹے چیمپئن سعدی عباس نے اولمپکس کوالیفائنگ راؤنڈ کی تیاریوں اوراولمپکس میں شرکت یقینی بنانے کیلئے سہولیات کی فراہمی کا مطالبہ کیا ہے۔سعدی عباس نے ایک ویڈیو پیغام میں کہا ہے کہ اولمپک کوالیفائنگ راؤنڈ 2018 میں شروع ہو گا جس میں ورلڈ پریمیئر لیگ، ایشین چیمپئن شپ، ایشین گیمز اور ورلڈ چیمپئن شپ کے ایونٹس شامل ہیں، اولمپکس میں کوالیفائی کرنے کیلیے ان ایونٹس میں شرکت کرتے ہوئے رینکنگ بہتر بنانے کی ضرورت ہے، بنیادی ضروریات کیلیے فنڈز دیئے جا رہے ہیں تاہم صرف یہ ہی کافی نہیں، اولمپکس میں شرکت کیلیے بین الاقوامی معیار کی پروفیشنل سہولیات درکار ہیں۔واضح رہے کہ ستمبر میں ورلڈ کراٹے فیڈریشن کے زیر اہتمام استنبول میں منعقدہ ورلڈ کراٹے 1 سیریز میں سعدی عباس نے پانچویں پوزیشن حاصل کی تھی، وہ دو مرتبہ کامن ویلتھ چیمپئن، یو ایس اوپن چیمپئن اور ساؤتھ ایشین چیمپئن رہ چکے ہیں جبکہ وہ کراٹے میں جنوبی ایشیا کے واحد گولڈ میڈلسٹ پلیئر ہیں، اسلامک سالیڈیرٹی گیمز میں بھی وہ سلور میڈل حاصل کر چکے ہیں۔