تازہ ترین
بنیادی صفحہ / سکواش / آل پاکستان سینئر سکواش چیمپئن شپ ،فرحان محبوب نے دانش اطلس خان کو انتہائی سنسنی خیز مقابلے کے بعد 3-2 سے شکست دے کر ٹائیٹل اپنے نام کر لیا

آل پاکستان سینئر سکواش چیمپئن شپ ،فرحان محبوب نے دانش اطلس خان کو انتہائی سنسنی خیز مقابلے کے بعد 3-2 سے شکست دے کر ٹائیٹل اپنے نام کر لیا

پشاور ۔ 4 مئی 2019 (سپورٹس ورلڈ نیوز) آل پاکستان سینئر سکواش چیمپئن شپ واپڈا کے فرحان محبوب نے جیت لی گزشتہ روز پشاور کے پی اے ایف سکواش کمپلیکس میں ہونیوالے فائنل کے موقع پر او سی یونٹ پاکستان ائرفورس کے ائر کموڈور سرفراز خان مہمان خصوصی تھے جنہوں نے کھلاڑیوں میں انعامات تقسیم کئے ان کے ہمراہ صوبائی سکواش ایسوسی ایشن کے صدر قمرزمان ‘سکواش کوچز محبوب خان ‘پی اے ایف سکواش اکیڈمی کے ہیڈ کوچ اطلس خان‘ پرویز خان ‘ چیف ریفری و چیف آ رگنائزر منور زمان سمیت دیگر شخصیات موجود تھیں ‘فائنل میں فرحان محبوب اور دانش اطلس خان کے درمیان کانٹے کا مقابلہ ہوا جس میں دونوں کھلاڑیوں نے شاندار کھیل کا مظاہرہ پیش کیا ‘فائنل میں سابق ورلڈ نمبر 14 پاکستان واپڈا کے فرحان محبوب نے خیبر پختونخوا کے دانش اطلس خان کے خلاف انتہائی سنسنی خیز مقابلے کے بعد تین – گیارہ ‘گیارہ – نو ‘گیارہ – چھ ‘سات – گیارہ اور گیارہ – نو سے کامیابی حاصل کرتے ہوئے ٹاءٹل اپنے نام کیا اس سے قبل سیمی فائنل میں واپڈا کے فرحان محبوب نے اپنے چھوٹے بھائی وقاص محبوب کے خلاف چونتیس منٹ کے مقابلے میں فرحان محبوب نے گیارہ نو ‘گیارہ چار اور گیارہ سات سے کامیابی حاصل کرتے ہوئے فائنل کے لئے کوالیفائی کیا تاہم دوسرے سیمی فائنل میں خیبرپختونخوا کے دانش اطلس خان نے اپ سیٹ کرتے ہوئے کے پی کے ہی ظاہر شاہ کے خلاف تین صفر سے کامیابی اپنے نام کی ان کی کامیابی کا سکور گیارہ چھ ‘گیارہ دو اور گیارہ نو رہا فائنل کے اختتام پر ائر کموڈور سرفراز خان نے کھلاڑیوں میں ٹرافیاں اور دیگر انعامات تقسیم کئے ۔